VA/Miljø-blad nr. 5, grøfteutføring fleksible røyr, og NS 3420 gjeld for grøfter med fleksible røyr, dvs. røyr av PVC-U, PE, PP, GRP og tynnvegga stålrøyr.
Bruk av NO – DIG løysingar er svært aktuelt å bruke mange stader og skal vurderast ved all utbetring/rehabilitering av eksisterande VA anlegg.
Tilsvarande er bruk av grunne grøfter, trykkavløp og isolerte røyr aktuelle løysingar. Dette gjeld særleg i hytteområde i fjellheimen der terrenginngrepa blir store ved å bruke konvensjonelle løysingar. Også i sårbare område ved kysten med lite lausmassar og mykje fjell i dagen, kan dette vere aktuelle løysingar. Ved bruk av isolerte røyr med varmekabel, skal det setjast krav til styring med temperatursensorar for å redusere straumforbruket. Vidare skal varmekablane vere «Ohmske», dvs. med fast straumforbruk pr meter kabel, slik at samla straumeffekt lett kan reknast ut for heile leidningssystemet.
Spesielt viktig er at røyrskøytar blir tette slik at fukt ikkje kjem inn på varmekablen.
Bruk av slike løysingar skal godkjennast av VA ansvarleg.
Ved boring i lausmassar/gjennomtrekking og kryssing av vegar og liknande, skal det brukast varerøyr. Vidare skal PE leidningar ha ei kappe av PP materiale. Tekniske løysingar ved gravefrie alternativ (styrt boring m.v.), og rehabilitering av leidningsanlegg skal godkjennast av VA ansvarleg i kommunen
Fundament og omfyllingsmasse skal vere i fraksjonen 8 – 22 mm Fraksjonen 8 – 16 mm kan berre brukast etter godkjenning av VA ansvarleg.
Ved dårlege grunntilhøve (ikkje drenerbare massar – dvs m.a. myr /leire) skal det brukast geotekstil/ fiberduk i botnen av grøfta samt sidene til over leidningsona. Fiberduk skal og brukast der omliggande massar er større steinar/fylling o.l. slik at det er fare for at omfyllingsmassane kan forsvinne ut av grøfta. Fiberduken skal dimensjonerast (val av bruksklasse) ut frå botnforhold og steinstorleik. Det blir her vist til VA miljøblad nr 5 samt Håndbok N200 frå Statens vegvesen.
Alle plastrøyr skal vere merka med Nordic Poly Mark (NPM). I tillegg gjeld for PVC røyra at alle pakningar vere faste dvs. ingen bruk av lause pakningar
Det skal brukast strekkfaste røyrkonstruksjonar og forankring av desse i trasear med større fall enn 200 ‰. I kryss med drensgrøfter eller veiter og ved leidningsfall større enn 1:5 skal det alltid etablerast stenge som hindrar vassinnsig i grøfta. Også i meir flate parti vil det kunne vere aktuelt å etablere grøftestengsel. Dette kan vere i myrområde, større retningsendringar m.v. VA ansvarleg avgjer når grøftestengsel er nødvendig å etablere. Mogleg utforming er vist på teikningane A 6 Grøftestengsel Betong og A7 Grøftestengsel Leire
Ved alle leidningsanlegg skal det vurderast kor vidt eigen drensleidning er nødvendig. Behovet for leidning og dimensjon på leidningen skal godkjennast av VA ansvarleg i kommunen.
Innbyrdes plassering av røyra i grøfta skal gjerast slik jf. teikning A2, A3 og A4. Minimum horisontal avstand mellom vassleidning og kablar er sett til 1 meter.
Ulvik herad – 1 nivå i samsvar med teikning A2
Kommunane Eidfjord, Fitjar, Kvinnherad, Tysnes og Vaksdal;
2 nivå med vassleidning øvst og overvassleidning til venstre
(alternativt speilvendt) jr. teikning A3.
Kommunane Bømlo, Kvam, Samnanger, Sveio og Ullensvang – 3 nivå med overvassleidning til venstre og lengst nede jf. teikning A4. For Ullensvang kommune skal spillvassrøyret ligge speilvendt i høve til teikninga altså på venstre side.
I tillegg gjeld særskilt for Eidfjord kommune
Nye anlegg skal leggjast på frostfri djupne. Dette gjeld heile kommunen.
For private stikkleidningar inne i hyttefelt over kote 600m kan kommunen godkjenna bruk av grunne grøfter og preisolerte røyr med varmekabel. Slike stikkleidningar skal ha ei overdekking på minst 1m.